ఊపిరి సలపని ఉత్కంఠ

ఊయల ఊగుతుందే
ముందుకూ వెనక్కూ
అల్లానే ఊగుతూ ఉండేదప్పుడు
నా గుండె కూడా అలసట లేకుండా
కవాటాలు తుత్తునియలు అయిపోతాయేమో
రక్తనాళాలు ఉత్కంఠ భరించలేక
విస్పోఠన చెందుతాయేమో నన్న
ఉత్కంఠ నిండి ఉండేది
అప్పుడు మోయడానికి
జ్ఞాపకాలు లేవు ఉట్టి గాయాలు తప్ప
అడుగు తీసి అడుగేద్దామంటే నిప్పులు కాల్తున్న భయం
అయినా సరే ఆపలేని మునివేళ్ళ మీద ప్రయాణం
ఒక్కోరోజు కుంపటి మీద కాగుతూ కూడా
పీడ కలల్ని భరించాల్సి వొచ్చేది
అప్పుడప్పుడైనా పంచుకుందామని దోసిలి నిండా
కలలు తీసుకునేవాణ్ణి
తల పైకెత్తి చూస్తే
కళ్ళ ముందు అంతా శూన్యం
ఎవరో చుట్టూ మూగి ఉన్నా
కళ్ల లోతుల్లో కనిపించని భావాల్ని
చదవలేని తడబాటు
గాయాల్నిలా మోసుకు తిరుగుతున్న కొద్దీ
కాలి బాట మరింత ఇరుకిరుగ్గా
ముళ్ళ పొదలతో తుప్పలతో
రాళ్ళూ రప్పలతో గీరుకుపోయిన
పచ్చి పుండు అయ్యేదేమో
ఇప్పటికైనా మేలుకోవడం మంచిదే అయ్యింది
ప్రాణాలైనా మిగిలి బ్రతికి బయట పడి పోయానుకదా

ఆనందోత్సాహం

చిగురుటాకంత స్నేహం కోసం

చినుకు రాలినంత ఆప్యాయతా సుమం కోసం

పువ్వు పుష్పించినంత వసంతం కోసం

గాలి సవ్వడంత ఆనందం కోసం

మరుమల్లెల సువాసనంత మధురిమకోసం

పుప్పొడి చప్పుడంత నిశ్శబ్దంతో

కలువల కళ్ళు విప్పార్చుకుని

ఆకాశంలో మబ్బుల్నీ

అవి వర్షించే వర్షపు ధారల్నీ

రెప్ప వాల్చకుండా వొచ్చే

చిరుజల్లుల వెన్నెల తెచ్చే

వర్షపు ధారల్నీ

ఒక ఆత్మీయుని ఆత్మీయత కొసం

ఇంకో ఆత్మ ఆర్థ్రంగా ఆప్యాయంగా

కళ్ళు కాయలు కాచేలా

చూపుల అగాధాల్లో

ఎదురు చూస్తూ చూస్తూ ఉండడం

ఎంత ఆనందోత్సాహమోగదా

బోసి నవ్వుల దేహ భాష

దిక్కు తోచని ప్రపంచపు
రోదనారణ్యాలలో
బోసినవ్వుల స్వర్గ దేహ భాషలు
ఏడుపులూ నవ్వులూ
అంతటా ఒకటే సంగీతం
నిద్రలోనూ మెలకువలోనూ
పెదవులపై అదే చిరు దరహాసపు
చెదరని లేలేత పువ్వుల భాష
ఎవ్వరూ పట్టని ఏ అవసరమూ లేని
ఉంగా ఉంగాల అందాల భాష
సాగుతూ ప్రాకుతూ
అదో విముక్త లోకపు మాయ భాష
పెదాలపై ఎప్పుడూ చెరగని చిరునవ్వుల చిలిపి భాష
స్వార్థాలసలే ఉండని కోపతాపాల్లేని ఒక్కటే కొంటె భాష
కడుపు ఖాళీ అయినపుడు మాత్రం ఆకలి భాష
సుస్తీ చేసినప్పుడైతే ఏడుపుల శోష భాష
ఇదో అద్భుతమైన అందాల అమాయక విశ్వభాష

శాంతివనం - సేవాసదనం

శాంతివనం - సర్వ సామాజిక సమ్మేళనం

ఎందరో అనాధలు అభాగ్యులున్నపుణ్యభూమి మనది.ఆ పుణ్యభూమిలో మనమూ పుట్టాం. పుట్టిన భాగ్యానికి మేమూ ఉన్నామనే విషయం గుర్తు చేసుకుందాం. మావంతుగా మేమూ ఎంతో కొంత సమాజానికి చేయూత నిద్దామని భావించాం.అందుకే ఒక అడుగు ముందుకు వేస్తున్నాం.అశాంతిలో ఉన్న సమాజానికి ఎంతో కొంత శాంతిని కలుగజేద్దామనే ఉద్దేశంతో ముందడుగు వేసి శాంతివనం స్థాపనకు పూనుకున్నాం.శాంతివనం ప్రథమ కర్తవ్యంగా అనాధ శిశువులకు చేయూతనిద్దాం అనుకున్నాం

ఎవ్వరూ నా అనేవాళ్ళు లేని పసిపిల్లలు ,అమ్మానాన్నా లేని అనాథలు ,పాపం పసివాళ్ళు వీళ్ళకు ఏదో దారి చూపించాలని మీకు అనిపిస్తే శాంతివనానికి తెలియజేయండి.5-10 సం: పిల్లల్ని బడికి పంపించి చదివించి వాళ్ళకు మేము చేయూత నిస్తాం. వాళ్ళకు మేమున్నామనే భరోసా కలిగిస్తాం.

సమాజములో కుళ్ళును కడిగి వెయ్యాలనుకునే వాళ్ళు,మానవత్వంతో స్పందించేవాళ్ళు,అనాధల పట్ల దయ కలిగినవాళ్ళు,అభాగ్యులను ఆదుకునేవాళ్ళుపిల్లల పట్ల ప్రేమ కలిగినవాళ్ళు,భాషాభిమానం కలిగిన వాళ్ళు,సంస్కృతి,సాహిత్యం,పర్యావరణం పట్ల అభిమానం ఉన్న వాళ్ళు మాతో చేయి చేయి కలపండి.అందరమూ కలిసి సమాజానికి చేయూత నిద్దాం.మనందరమూ కలిసి ఒక మెరుగైన సమాజాన్ని నిర్మిద్దాం.శాంతివనంలో సేవ, సంస్కృతి,సాహిత్యం,భాషా సంపదలను వెల్లివిరియజేద్దాం.

సంప్రదించడానికి:శింగరాయకొండ-9866343823 , ఒంగోలు-9949535695, మేఘ ఇ.ఎన్.టి.హాస్పిటల్.సుందరయ్య భవన్ రోడ్